- Aburuzan kalitate handiko sagardo naturala lortzeko lanean dihardugu egunero. Trazabilitate sistema bat jarri dugu (APPCC) sagardogintza osoa, hasieratik amaieraraino, sagarrondotik botilaraino, kontrolatu ahal izateko.
- Sagarra
- Irailaren erdi aldean hasten da biltzen eta azaroaren hasieran-edo bukatzen da lan hori. Mota bakoitza bere garaian heltzen da; beraz, sagar guztiak ez dira batera biltzen. Klima da funtsezko beste faktore bat; horren baitan, sagarra lehenago edo beranduago etorriko da.
- Garbiketa
- Aburuzan badakigu zeinen garrantzitsua den garbiketa bai sagarrari dagokionez bai prozesu osoari begira. Lehen-lehenik arrastan eramaten ditugu sagarrak uretan, eta horrela garbitzen joaten dira, eta sareta batzuetatik pasarazten dira ura eta sagarrak bereizteko, eta izan dezaketen zikinkeria guztia bertan uzteko. Hurrena, sagar hori tunel antzeko batera joaten da, eta bertan, behin eta berriz urberritzen da, handik eta hemendik presioz botatako ur-zorrotaden bidez.
- Hautaketa
- Sagarra ondo garbitu eta gero, aukeraketa egiteko uhal garraiatzaile batera pasatzen da. Uhal honetan zera egiten da, onak ez diren sagar guztiak baztertu. Hautaketa guztia eskuz egiten da.
- Birringailua
- Hautaketa egindakoan, sagarra birringailutik pasako da, eta zatietan txikituta geratuko da. Makina hori gure gustura doituko dugu: sagarra zenbat eta helduago egon, orduan eta handiagoak izango dira zatiak; eta zenbat eta berdeago, orduan eta txikiagoak zatiak. Oso garrantzitsua da sagarraren hazia ez txikitzea; haziek osorik atera behar dute birringailutik, sagardoak nahi ez dugun zaporerik izan ez dezan gero; izan ere, haziak zapore fuerteegia ematen baitio sagardoari.
- Dolarea
- Sagarrak zatitu eta gero, dolarean sartuko ditugu, muztioa ateratzeko. Sagarra oso presio txikian hasten da prentsatzen, haziak, lehen esan dugun bezala, ez txikitzeko. Muztioa lortzen denean analisiak egiten dira: garraztasunarena, ph-rena, azukrearena eta taninoarena.
- Dekantazioa
- Dekantazioa solidoak eta muztioa modu naturalean bereiztea da. Dekantazioa 10-12ºC artean egingo dugu, beraz hartzidura atzeratu egingo dugu, eta muztioa solidoetatik bereiztuko; solido horiek beren pisuz erortzen joango dira, dekantazio-denbora: 16-24 ordu. Ondoren, muztio garbia beste biltegi batera pasako genuke (ontzi-aldaketa), han hartzidura egin dadin.
- Hartzidura
- Muztioaren azukrea alkohola bilakatzea da. Oso garrantzitsua da tenperatura hartzidura garaian; zenbat eta hotzago daukagun muztioa, orduan eta motelago egingo da hartzidura, eta kalitatezko sagardo batentzako hain garrantzitsua den karboniko hori gutxiago gastatuko du.
- Kontsumorako gomendioak
- Hartzidura amaitu eta gero, prest dago, txotxean zein botilan kontsumitzeko. 10-13ºC-ko tenperaturan hartzea gomendatzen da eta aldian-aldian juxtu-juxtu edan nahi dena aterata, bere aroma-aitzindariak lurruntzeko. ON EGIN!
Sidras Aburuza S.L.
Goiburu auzoa 20150 - ADUNA (Gipuzkoa)
Telf: 943 692 452
Fax: 943 692 153
www.sidrasaburuza.net
E-posta: aburuza@sidrasaburuza.net